Гродзенская зямля лічыцца самай багатай на каталіцкія храмы. Сярод іх сустракаюцца адменна маляўнічыя і яркія, напрыклад, касцёл Маці Божай Ружанцовай, які ўваходзіць у спіс гісторыка-культурных каштоўнасцяў Беларусі. І сапраўды, пабываўшы ў гэтых атмасферных месцах, захочацца вярнуцца сюды яшчэ не адзін раз.

Касцёл, які лічыцца адносна маладым, ужо на працягу практычна стагоддзя ўпрыгожвае аграмястэчка Солы, хоць прыход для католікаў быў заснаваны ў гэтых месцах яшчэ ў 1589 годзе. У той час на месцы цяперашняга будынка стаяў драўляны касцёл, збудаваны за кошт датацый гетмана Хрыстафора Радзівіла. Храм практычна цалкам быў знішчаны падчас падзей руска-польскай вайны ў сярэдзіне XVII стагоддзя. Крыху пазней яго зноў адбудавалі, аднак нашэсце напалеонаўскага войска было бязлітасным да храма. Напачатку XX стагоддзі ў Солах зноў узвялі будынак, але ў якасці матэрыялу быў выкарыстаны даўгавечны і трывалы камень. Цяпер гэта рэлігійнае збудаванне ўваходзіць у склад дзесяці самых прыгожых храмаў Беларусі.

Праект новага будынка каталіцкай святыні быў старанна распрацаваны таленавітым архітэктарам Адамам Дубаневічам, які задумаў стварыць пабудову ў стылі мадэрн. Будаванне было цалкам ажыццяўлёна за кошт сродкаў гараджанаў. Тады на ўзвядзенне храма выдаткавалі 540 000 злотых, што на той час было велізарнай сумай. Сумная доля зачынення рэлігійных устаноў падчас Вялікай Айчыннай вайны мінула касцёл у Солах. Ён не прыпыняў працы, і ў самыя цяжкія вайсковыя часы заставаўся адзіным прыстанкам для веруючых у гэтым рэгіёне.

Будынак касцёла выглядае вельмі незвычайна і вельмі адрозніваецца ад іншых тыповых касцёлаў Гродзенскай вобласці. Пабудова ўяўляецца асіметрычнай, мае шматпланавую архітэктуру і аб'ёмна-прасторавую кампазіцыю. Стыль мадэрн заўсёды вельмі адрозніваўся ад іншых архітэктурных кірункаў, асабліва калі яго выкарысталі пры будаванні храмаў. З 1926 года касцёл Маці Божай Ружанцовай уражае кожнага сваёй манументальнай веліччу. Разыначкай усёй пабудовы лічацца бакавыя галерэі-аркады, упрыгожаныя фігурнымі калонамі. Разам з гэтым аблічча храма знадворку па-дамашняму прыемнае, сюды хочацца прыходзіць яшчэ і яшчэ, тут нібы ўз'ядноўваешся з Богам.

Інтэр'ер храма адрозніваецца багаццем і наяўнасцю ўнікальных абразоў. Немагчыма не заўважыць алтарнае аблічча Маці Божай Чанстахоўскай, каля якога размяшчаюцца бакавыя фрэскі. Менавіта гэтыя роспісы расказваюць пра дзве самыя буйныя гістарычныя падзеі ў гісторыі Рэчы Паспалітай: абарона Яснагорскага манастыра ў Польшчы ў 1665 годзе пры нашэсці шведаў, а таксама бітва за Варшаву ў часы савецка-польскай вайны ў 1919 годзе.

Акрамя асноўных архітэктурных і інтэр'ерных вартасцяў, касцёл Маці Божай у Солах можа пахваліцца наяўнасцю ўласнага аргана. Таму нядзельныя і святочныя набажэнства асабліва наведвальныя: стварэнне асаблівай атмасферы падчас спеву і арганнай музыкі наладжвае вернікаў на пэўныя думкі, супакойвае розум і ўтаймоўвае душу.

Дарэчы, аграмястэчка Солы знакаміта не толькі сваім самым прыгожым касцёлам, але і такой гістарычнай падзеяй, як падпісанне пагаднення паміж СССР і Германіяй, якое спыніла вайсковыя дзеянні на Заходнім фронце падчас Першай сусветнай вайны. Гэта перамір'е стала пачаткам стварэння Брэсцкай мірнай дамовы, што паслужыла канчатковаму завяршэнню баявых дзеянняў.