Нацыянальная бібліятэка Беларусі - гэта сучасны сацыяльна-культурны цэнтр, які не мае аналагаў ва ўсёй краіне. Будынак бібліятэкі з’яўляецца адным з самых унікальных архітэктурных гарадскіх аб'ектаў, які прываблівае падарожнікаў з усяго свету. Нацыянальная бібліятэка Беларусі заснавана ў 1922 годзе, а ў 2002 было пачата будаўніцтва яе сучаснага будынка. У народзе яго назвалі «Алмаз ведаў», бо будынак мае форму  ромбакубактаэдра – паўправільнага шматгаранніка, які стаіць на шматузроўневай падстаўцы. Архітэктары праекта - М. Вінаградаў і В. Крамарэнка - выбралі форму алмаза, бо ён сімвалізуе такія каштоўнасці, як культура, веды і мудрасць. Ад такой неверагоднай архітэктурнай ідэі да яе ўвасаблення прайшло цэлых трынаццаць гадоў! Уявіць гэты шэдэўр немагчыма, лепш адправіцца ў Мінск і ўбачыць усё сваімі вачыма.

Парадны ўваход у бібліятэку ўяўляе сабой разгорнутую кнігу з надпісам «Каб быў дасканалым божы чалавек» на дзевятнаццаці мовах. «Алмаз ведаў» уключаны ў кнігу «100 дзіўных дасягненняў сучаснай архітэктуры». Тут знаходзяцца 9 мільёнаў экзэмпляраў кніг, 20 чытальных залаў, Музей рэдкіх кніг і рукапісаў, сярод якіх арыгіналы кніг першадрукара Ф. Скарыны, выдадзеныя ў XVI стагоддзі; рэпрадукцыя карты Вялікага Літоўскага княства 1613 года; карта Парыжа 1739 года; розныя арабскія і японскія рукапісы; будыйскія сутры і тыбецкія манускрыпты. Дарэчы, на афіцыйнай старонцы бібліятэкі ў Інтэрнэце Вы можаце наведаць віртуальныя выставы і калекцыі, прадстаўленыя ў фармаце слайд-шоу.

Уваходзячы ў будынак Нацыянальнай бібліятэкі, вы трапляеце ў вялікі светлы хол з калонамі, шклянымі мастамі, фантанамі, раслінамі, прывезенымі з розных краін свету (больш за 1125 відаў), зонамі адпачынку. Затым вы ўбачыце аграмадны экзэмпляр старажытнай кнігі «Спадчына Францыска Скарыны». Усё пералічанае вышэй ўяўляе сабой сацыякультурны цэнтр. З мэтай правядзення міжнародных палітычных і эканамічных форумаў, культурных мерапрыемстваў, прэс-канферэнцый ў 2005 годзе быў адкрыты сучасны цэнтр перамоваў, забяспечаны ўсім неабходным абсталяваннем для правядзення мерапрыемстваў на высокім узроўні.

Асобнай увагі заслугоўвае галерэйна-выставачны комплекс, прызначаны для правядзення выстаў і прэзентацый новых экспазіцый. Сюды ўваходзяць пяць залаў з незвычайнымі назвамі: «Атрыум», «Лабірынт», «Панарама», «Мабільная галерэя» і «Ракурс». Агульная адначасовая ўмяшчальнасць залаў - каля 300. Але трэба ўлічыць, што наведванне «Панарамы» платнае, бо зала знаходзіцца на закрытай агляднай пляцоўцы на 22-ім паверсе Нацыянальнай бібліятэкі. Важна адзначыць, што наведванне галерэі бясплатнае толькі для ўладальнікаў чытацкага абанемента або па спецыяльным прапускам «Сацыякультурны цэнтр». У галерэйным комплексе часта праводзяць кніжныя выставы і прэзентацыі навінак. Ва ўсіх наведвальнікаў ёсць магчымасць вывучаць фонд з дапамогай віртуальных выстаў.

Атрымаць асалоду ад выдатных гарадскіх краявідаў вы можаце на адкрытай агляднай пляцоўцы, якая знаходзіцца на 72-метровай вышыні, побач з якой знаходзіцца фондасховішча.

• Нацыянальная бібліятэка прапануе ўсім падарожнікам шэраг экскурсій:

• «Наведванне агляднай пляцоўкі «Мінск на далоні»; 

• Экскурсія па бібліятэцы, уключаючы Музей рэдкіх кніг;

• Дзіцячыя тэматычныя экскурсіі.

 Для камфортнага правядзення часу наведвальнікаў створаны ўсе ўмовы: зоны адпачынку з мяккімі канапамі, рэстаран, некалькі кафэ, дзіцячы пакой для гульняў і нават цэнтр фізічнай культуры.