Царква Святога Георгія ў вёсцы Альба

Альба

Цэрквы, касцёлы, саборы, манастыры

Альба - вёска Івацэвіцкага раёна, размешчаная ва ўсходнім кірунку ад раённага цэнтра і якая ўваходзіць у склад Квасевiчскага сельскага савета. Населены пункт вядомы з XVII стагоддзя. І хоць сёння гэта невялікая вёска, тут захаваўся архітэктурны помнік канца XVIII стагоддзя - царква святога Георгія.

Першапачаткова храм, пабудаваны ў 1790 годзе, з'яўляўся каталіцкім і увабраў у сябе рысы готыкі і рэнесансу. У 1904 годзе гэты храм быў перабудаваны, змяніўшы сваё першапачатковае аблічча. Сёння гэта праваслаўная царква, узведзеная на цагляным падмурку, але пры гэтым пабудаваная з дрэва. Храм прамавугольны ў плане, мае тры зрубы, гарызантальна абабітыя дошкамі. Да асноўнага аб'ёму будынка, які мае скляпеністае перакрыцце, прымыкае чацверыковая двух'ярусная вежа-званіца, прыбудаваная ў пачатку ХХ стагоддзя і на палову шырыні убудаваная ў асноўны аб'ём храма. Званіца завяршаецца шасцігранным цыбульным купалам. З іншага боку храм мае пяцігранную апсіду, на вяршыні якой таксама размешчаны купал. Асноўная частка царквы і апсіда ўвянчаныя агульным шатровым дахам. Над алтарнай часткай дах мае вальмы. Аконныя праёмы царквы выкананы ў форме арак.

Хоры маюць складаны па форме праём, які раскрывае іх да асноўнага аб'ёма храма. Ўнутры храма, перад алтарнай часткай, размешчаны разьбяны барочны іканастас і царскія вароты. Іконы, якія захоўваюцца ў храме, напісаны ў канцы ХХ стагоддзя.

У агульным архітэктурным абліччы назіраецца асіметрыя, а таксама адсутнасць асаблівых дэкаратыўных элементаў у вонкавым афармленні будынка, што робіць царкву досыць простай і строгай.

Царква размешчана на ўскраіне Ружанскай пушчы, якая прадстаўляе сабой заказнік рэспубліканскага значэння. Яна знаходзіцца на маршруце, які злучае два важных турыстычных аб'екта - Ружаны і Косава. Дзякуючы такому ўдаламу размяшчэнню, храм уключаны ў шэраг экскурсійных маршрутаў. Асабліва цікавым ён здаецца тым, каго прыцягвае рэлігійная спадчына Івацэвіцкага раёна ў прыватнасці і Беларусі ў цэлым.

Значна пацярпеў храм у гады першай сусветнай вайны. У перыяд з 1964 па 1989 гады царква была зачынена, набажэнствы ў ёй не праводзіліся.

Побач з царквой размешчаны старадаўнія могілкі. У 1902 годзе тут быў пахаваны святар Ян Аніёнаў-Дзевiцкi, які пры жыцці служыў у царкве. У пачатку Першай сусветнай вайны побач з храмам былі пахаваны нямецкія салдаты, якія былі эксгумаваныя ў 1930-х гадах і перавезены ў Германію.

Царква ў вёсцы Альба, размешчаная на самой яе ўскраіне ля суседняга населенага пункта Iодчыкi, названа ў гонар апекуна воінаў, пастухоў і земляробаў - святога Георгія, які жыў у III стагоддзі. На Русі, дзе шанаванне святога набыло папулярнасць з часоў праўлення князя Яраслава Мудрага, больш распаўсюджаным стаў іншы варыянт яго імя - Юрый, днямі памяці якога з'яўляюцца так званыя Юр'евы дні - 23 красавіка і 26 лістапада (вясновы і восеньскі Юр'еў дзень адпаведна).

Карта месцазнаходжаньня


Зварот да спісу