У невялікім беларускім мястэчку ёсць адна буйная і важная гістарычная славутасць, якая вядома ва ўсім свеце. Менавіта гэтая архітэктурная пабудова ўваходзіць у спіс сусветнай спадчыны ЮНЭСКА. Вядома ж, гаворка ідзе пра Мірскі замак, а экскурсія ў горад Мір лічыцца адной з самых часта наведвальных сярод турыстаў з іншых краін.

Аднак, акрамя Мірскага замка, тут ёсць, на што паглядзець яшчэ. Напрыклад, знакаміты на ўвесь рэгіён прыватны музей «Мірскі пасад». Пра яго вядома нешматлікім экскурсаводам, таму ў музеі няма велізарнай колькасці турыстаў і бясконцых успышак фотаапаратаў.

Гісторыя ўзнікнення гэтага музея моцна адрозніваецца ад іншых беларускіх выстаў. Валодае незвычайнай экспазіцыяй гісторык Віктар Сакель, які яшчэ ў дзяцінстве захапіўся вывучэннем гістарычных падзей. Гуляючы ў гасцях у бабулі, маленькі Віця знайшоў на гарышчы старадаўні куфар, у якім былі акуратна складзены старыя рэчы, паштоўкі і іншыя прадметы побыту. Менавіта пасля гэтага выпадку хлапчук улюбіўся ў гісторыю свайго роднага краю і пачаў збіраць старажытныя рарытэтныя артэфакты. Пасля звычайнае хобі перарасло ў штодзённую любімую працу. Не адзін дзясятак гадоў краязнаўца старанна збіраў усё, што якім б там ні было чынам датычылася гісторыі яго роднага мястэчка. Каб мець магчымасць выстаўляць сабраныя артэфакты, мужчына нават набыў для выставы невялікае цаглянае памяшканне, якое, дарэчы, таксама з'яўляецца гістарычным.

Такім чынам, сёння ў музеі можна ўбачыць немалую экспазіцыю ўнікальных рэчаў. Тут і старадаўнія манеты, і княская мэбля, і граматы, і посуд, ёсць нават асабістыя рэчы Радзівілаў. Пры гэтым сам гаспадар музея захоплена расказвае ўсім наведвальнікам незвычайныя гісторыі, звязаныя з жыццём гэтых рарытэтных экспанатаў. Усё гэта суправаджаецца тэматычнай музыкай, якая гучыць з старадаўняй пласцінкі. Віктар Сакель бясспрэчна стварае ў сваім музеі ўнікальную прыемную атмасферу таго часу. Менавіта за кошт гэтага ўсе прадметы нібы напаўняюцца асаблівым шармам і ажываюць.

Адна з залаў прысвечана яўрэйскай абшчыне і іншым канфесіям, якія ў розны час існавалі ў горадзе Міры. Атрымаць нагляднае ўяўленне пра жыццё і асноўныя традыцыі мясцовага яўрэйскага насельніцтва можна з дапамогай чаш для абмывання рук, кіп, мірскай торы XIX стагоддзя і старадаўніх кніг. Ваенныя падзеі 1941-1945 гадоў практычна цалкам разбурылі сведчанні жыцця яўрэяў у Міры, аднак усё тое, што атрымалася выратаваць, можна ўбачыць у музеі «Мірскі пасад». Тут жа пададзены страшныя сведчанні трагедый, якія сталі вынікам злачынства фашыстаў падчас Вялікай Айчыннай вайны.

Віктар Сакель, нібы клапатлівы бацька, вельмі старанна і асцярожна адносіцца да ўсіх экспанатаў. Аднак разам з гэтым многім турыстам дазваляе дакранацца да некаторых рэчаў і нават браць іх у рукі і фатаграфаваць.