Уздоўж маляўнічай рэчкі Дняпро размясцілася вёска Палыкавічы, вядомая ў народзе сваёй гаючай крыніцай. Шматразовыя даследаванні пацвярджаюць факт таго, што вада ў крыніцы багатая мінераламі, асабліва кальцыем, і вылечвае людзей ад кожнага роду хвароб, а таксама станоўча ўплывае на жанчын, дапамагаючы нарадзіць здаровае дзіця і пабудаваць моцную сям'ю. Вёска Палыкавічы вядомая яшчэ тым, што ў царскія часы тут вельмі любілі бываць Мікалай II са сваёй жонкай Аляксандрай Фёдараўнай, якой так падабаліся пясчаныя пляжы і маляўнічая прырода ўздоўж Дняпра.

Каля Палыкавіцкай крыніцы знаходзіцца адна з вядомых славутасцяў – праваслаўная капліца ў імя Святой вялікапакутніцы Параскевы Пятніцы, узведзеная літоўскім генерал-губернатарам Аляксандрам Рымскім-Корсакавым у 1892 годзе. Па паданні, Святая пакутніца Параскева жыла ў III стагоддзі і была нарачона сваімі бацькамі Пятніцай, бо яны шанавалі дзень пакут Гасподніх. Трагічна склаўся лёс дзяўчыны. Калі яна была зусім юнай, прыняла зарок бясшлюбнасці, прысвяціўшы ўсю сябе Богу. Аднойчы жорсткія язычнікі схапілі яе і доўга катавалі. У ход ішлі жудасныя і ўдасканаленыя метады катаванняў, але юная пакутніца была непахісная і не адмовілася ад сваёй веры. Калі язычнікі кінулі яе ў турму, Бог вылячыў Параскеву, залячыў усе скрываўленыя раны, але і гэта не выратавала дзяўчыну. На наступны дзень ёй адсеклі галаву.

Ва ўсе часы Святая вялікапакутніца Параскева карыстаецца вялікай народнай любоўю і шанаваннем, а ў Палыкавіцкай капліцы кожны год 10 лістапада адзначаецца Дзень памяці Святой Параскевы – захавальніцы дамашняга ачагу і апякункі палёў і жывёл. З 8-ай па 10-ю пятніцу пасля Вялікадня ў Палыкавічы з'язджаюцца паломнікі з усяго свету, каб здзейсніць набажэнства і ўрачыстае шэсце з крыжом, названае хрэсным ходам. Лічыцца, што менавіта ў гэтыя дні вада ў крыніцы валодае магутнымі гаючымі ўласцівасцямі.

У гады Кастрычніцкай рэвалюцыі праваслаўная капліца ў Палыкавічах была разбурана і толькі праз 70 гадоў адноўлена. Вонкавае аблічча новай капліцы практычна не адрозніваецца ад былой выявы – пяцікупальны квадратны будынак з цёмна-чырвонай цэглы з ажурным дахам, што ўзвышаецца над жыватворнай крыніцай. Дзіўна, але новы будынак праваслаўнай капліцы быў пабудаваны на асабістыя сродкі шлюбнай пары з Германіі Алы і Дытара Арнольд, якія з'яўляліся сталымі вернікамі капліцы. Сям'я Арнольдаў прыняла хрышчэнне ў дзень асвячэння архібіскупам Магілёўскім і Мсціслаўскім Максімам капліцы ў чэрвені 2000 года.

Над святой крыніцай і праваслаўнай капліцай узвышаецца «жамчужына Магілёўшчыны» - Свята-Траецкая царква, асвячоная ў студзені 2012 года. У царкве захоўваюцца мошчы Святой вялікапакутніцы Параскевы. А ў капліцы вы зможаце ўбачыць святы абраз Мікалая II.

Адпраўляйцеся ў Палыкавічы і наведайце гэты святы ансамбль, абавязкова выпіце вады і выкупайцеся ў жыватворнай крыніцы, памаліцеся Святой пакутніцы Параскеве і прагуляйцеся па маляўнічых месцах, дзе некалі адпачывала царская пара!

Крыніца фота:  http://sobory.ru/