Даведацца пра калядныя абрады продкаў і нават стварыць уласны можна ў музеі Мінска

Дзеці і іх бацькі могуць даведацца пра традыцыі святкавання Новага года і Каляд на інтэрактыўна-пазнавальным мерапрыемстве «Калядныя цуды». Пройдзе яно ў Дзяржаўным музеі беларускай гісторыі і літаратуры ў Мінску. Праграму праводзяць падчас наведвання выставы, прысвечанай навагоднім традыцыям.

Наведаўшы мерапрыемства, можна будзе даведацца, чаму Каляды так шмат значылі для нашых продкаў, як іх адзначалі, што гатавалі на стол, якія песні спявалі і ў якія гульні гулялі. Раскажуць і пра традыцыйныя калядныя варожбы на будучыню.

Маленькія наведвальнікі музея змогуць разам з работнікамі прыдумаць новы калядны абрад! Таксама будзе арганізавана творчая майстэрня, дзе дзецям прапануюць стварыць ёлачную цацку сваімі рукамі.

Выстава будзе цікавая як дзецям дашкольнага ўзросту, так і школьнікам, а таксама дарослым. Бо паверыць у цуд ніколі не позна! Наведаць экспазіцыю можна па 21 студзеня 2022 уключна.