Мінск у кіно: месцы, якія патрапілі ў знакамітыя фільмы

Кіно, мабыць, адзін з самых уплывовых і папулярных відаў мастацтва ў свеце. У фільмах мараць здымацца мільёны людзей, пры гэтым і быць здымачнай пляцоўкай — вельмі прэстыжна для любой краіны. І калі ўсё беспамылкова могуць сказаць, дзе здымалі легендарны эпас "Уладар кольцаў" ці знакаміты серыял "Гульня прастолаў", то ці можаце вы сабе ўявіць, што народна любімыя "Сваты" здымаліся якраз у Беларусі? Ці што ў Мінску не раз адбываліся маштабныя здымкі кінастужак, якія ў пракаце затым сабралі больш за мільён даляраў? Пра ўсё гэта чытайце ў нашым артыкуле.

Цікавыя факты пра фільмы, знятыя у Мінску ў мінулым стагоддзі

Мінск як адна з самых прыгожых сталіц постсавецкай прасторы часта з'яўляецца ў кадры айчынных і замежных фільмаў. Яшчэ з другой паловы XX стагоддзя шматлікія рэжысёры імкнуліся здымаць тут свае кінастужкі.

Адзін з самых знакамітых фільмаў, часткова знятых у Мінску — гэта "Бураціна" рэжысёра Леаніда Нячаева. Прывычнага нам Мінска вы тут, вядома. не знойдзеце (фільм здымалі ў павільёнах), аднак менавіта ў Беларусі адбылася лёсавызначальная сустрэча Бураціна з Тарцілай.

Мінск 80-х захаваны ў знакамітым фільме "Давай пажэнімся", знятым у 1982 годзе, і камедыі "Не разумею" (1989). У апошняй, дарэчы, упершыню зняўся Міхаіл Задорнаў.

90-ыя захаваны ў камедыі з Міхаілам Еўдакімавым "Не жадаю жаніцца!" (1993) і ў папулярным расійскім серыяле з беларускімі акцёрамі "Паскораная дапамога" (1997). Акрамя таго, галоўны герой фільма "Справа Лахоўскага” паводле сцэнара лётаў на верталёце над Мінскам.

Самыя касавыя сучасныя фільмы, знятыя ў Мінску

Расійскія рэжысёры любяць здымаць у Мінску, прычым не толькі дзякуючы адносна невысокім коштам. Сюды едуць за непераўзыйдзеным каларытам.

Топ-5 фільмаў, знятых у Мінску, якія сабралі ў пракаце больш мільёна:

"Паляванне на піранню" (2006 год)

Сюжэт: у расійскім баявіку галоўныя героі адпраўляюцца ў Сібір, каб знішчыць лабараторыю хімічнай зброі. Менавіта дзеля эканоміі сродкаў сібірскую тайгу здымалі пад Мінскам.

Касавыя зборы: 6,2 млн.

"Стылягі" (2008 год)

Сюжэт: яркі фільм пра "савок" і як савецкая моладзь з ім змагалася. Якасны саўндтрэк ад расійскіх рок-зорак, выдатны акцёрскі склад, сталічны ДУМ, праспект Незалежнасці, Нацыянальны мастацкі музей, якія беспамылкова пазнаюцца з першага погляду — фільм быў проста асуджаны на поспех.

Касавыя зборы: 16,8 млн.

"Поп" (2009 год)

Сюжэт: гістарычную драму пра прыбалтыйскіх святароў, якія адраджалі хрысціянства на акупіраваных тэрыторыях, часткова знялі ў музеі народнай архітэктуры і побыту пад Мінскам — у Строчыцах.

Касавыя зборы: 1,7 млн.

"ПіраМММіда" (2011 год)

Сюжэт: заснаваны на кнізе Сяргея Маўродзі пра знакамітую фінансавую піраміду 90-х — "МММ". Менавіта ў Мінску здымалі "Расію 90-х", а таму ў кадры з'яўляюцца то знаёмыя вуліцы, то Палац Рэспублікі.

Касавыя зборы: 1,2 млн.

"Шпіён" (2012 год)

Сюжэт: фільм з'яўляецца экранізацыяй рамана Барыса Акуніна, у ім паказана супрацьстаянне фашысцкага шпіёна і савецкай разведкі. Фёдар Бандарчук і Даніла Казлоўскі ў галоўных ралях, праспект Незалежнасці і кінатэатр "Цэнтральны" ў кадры — вось рэцэпт паспяховага кіно!

Касавыя зборы: 4,6 млн.

Дзе здымалі "Сваты" і "Місія невыканальная 5"

А вы пазналі Нацыянальны аэрапорт горада Мінска, які засвяціўся ў фільме "Місія невыканальная 5"? Сапраўды, падзеі пачынаюць разгортвацца менавіта ў Мінску, аднак Том Круз так і не пабываў у сталіцы Беларусі. На жаль, рэжысёры адмовіліся ад здымак натуры і знялі "Беларусь" у брытанскім графстве Лінкальншыр.

А вось здымкі 7-га сезона расійскага серыяла "Сваты" якраз адбываліся не так даўно ў Беларусі. У 2017 годзе здымачная група пабывала не толькі ў Мінску, але і ў іншых месцах нашай краіны. У кадр патрапілі і папулярныя беларускія выбітнасці: завод БЕЛАЗ у Жодзіна, сядзіба Агінскага ў Залессе і інш.

Фанаты пільнавалі акцёраў да дзвюх гадзін ночы, а некаторыя нават прыязджалі з іншых гарадоў дзеля таго, каб адным вочкам паглядзець на здымачную пляцоўку.

Мінск кінематаграфічны

Напэўна знойдуцца людзі, якія скажуць, што здымкі перашкаджаюць — перакрываецца дарожны рух, часта праблематычна дабрацца да патрэбнага месца. Але затое як прыемна пасля назіраць прыгажосці беларускай сталіцы ў кіно! Яе шырокія праспекты і вузкія вулачкі, гістарычны цэнтр і сучасныя славутасці натхняюць і будуць натхняць рэжысёраў з усяго свету. За Мінскам у якасці дэкарацый - будучыня. Мы ўпэўнены, што яшчэ не адзін фільм пазнаёміць яго з тэлегледачамі ці нават стане нагодай адправіцца сюды на экскурсію. Бо нездарма кажуць, што лепш адзін раз убачыць, чым сто разоў пачуць — прычым убачыць ужывую, каб прасякнуцца атмасферай такога жывога, такога прыгожага і такога роднага Мінска.

Чытайце таксама

Чаму Ваша наступная паездка павінна быць у Беларусь?

Што паглядзець у Мінску за 3 дні?

Гайд па палацах Беларусі

Топ-50 славутасцей Мінска

Яркая Кастрычніцкая і запальная Зыбіцкая: лепшыя вуліцы Мінска